LA 
EN 
ໃນເມື່ອບໍ່ດົນຜ່ານມາ, ຢູ່ທີ່ມະຫາວິທະຍາໄລແຫ່ງຊາດ ໄດ້ຈັດພິທີເຜີຍແຜ່ດຳລັດ ວ່າດ້ວຍການປົກປ້ອງເງິນຝາກ, ເຂົ້າຮ່ວມພິທີຄັ້ງນີລວມມີທ່ານ ນ ແສງດາວວີ ວົງຄຳຊາວ ຫົວໜ້າສຳນັກງານປົກປ້ອງເງິນຝາກ, ທ່ານ ປທ ເພັດສະໝອນ ພົມມະວົງ ວ່າການຄະນະບໍດີ ຄະນະເສດຖະສາດບໍລິຫານທຸລະກິດ ມະຫາວິທະຍາໄລແຫ່ງຊາດ, ບັນດາທ່ານ ຄູອາຈານ ພ້ອມດ້ວຍນັກສຶກສາມະຫາວິທະຍາໄລແຫ່ງຊາດລາວ ຈຳນວນ 100 ກ່ວາຄົນ.
ໃຫ້ກຽດກ່າວເປີດພິທີໃນຄັ້ງນີ້ ແມ່ນ ທ່ານ ນ ແສງດາວວີ ວົງຄຳຊາວ ຫົວໜ້າສຳນັກງານປົກປ້ອງເງິນຝາກ ແລະ ກ່າວມີຄຳເຫັນໂດຍທ່ານ ປທ ເພັດສະໝອນ ພົມມະວົງ ວ່າການຄະນະບໍດີ ຄະນະເສດຖະສາດບໍລິຫານທຸລະ ກິດ ມະຫາວິທະຍາໄລແຫ່ງຊາດ.
ໃນນັ້ນ, ທ່ານ ນ ແສງດາວວີ ວົງຄຳຊາວ ໄດ້ຍົກໃຫ້ເຫັນຈຸດປະສົງຂອງການເຜີຍແຜ່ຄັ້ງນີ້ແມ່ນເພື່ອເປັນການສ້າງຂະບວນການ ຕິດພັນກັັບວຽກງານວິຊາສະເພາະ ກ່ອນຈະເປີດກອງປະຊຸມໃຫຍ່ຄັ້ງທີ III ຂອງໜ່ວຍພັກສໍານັກງານປົກປ້ອງເງິນ ທີ່ຈະມີຂຶ້ນໃນໄວໆນີ້, ເພື່ອປະຕິບັດຕາມແຜນ ການວຽກງານຈຸດສຸມ ຂອງສໍານັກງານປົກປ້ອງເງິນຝາກ ປະຈໍາປີ 2019, ເພື່ອໃຫ້ສັງຄົມຊັບຊາບກັນຢ່າງກວ້າງຂວາງກ່ຽວກັບວຽກງານປົກປ້ອງເງິນຝາກຂອງ ສປປ ລາວ ໃນຂອບເຂດທົ່ວປະເທດ ທັງນີ້ ເພື່ອສ້າງຄວາມຮັບຮູ້ ແລະ ເຂົ້າໃຈ ກ່ຽວກັບວຽກງານປົກປ້ອງເງິນຝາກ ກໍ່ຄື ສຳນັກງານປົກປ້ອງເງິນຝາກ ໃນການເຮັດໜ້າທີ່ປົກປ້ອງສິດຜົນປະໂຫຍດຂອງຜູ້ຝາກເງິນ ໃນເວລາທີ່ສະຖາບັນການເງິນໃດໜຶ່ງທີ່ເປັນສະມາຊິກຫາກຕົກໃນສະພາວະລົ້ມລະລາຍ, ສຳນັກງານປົກປ້ອງເງິນຝາກ ຈະຈ່າຍຄືນເງິນຝາກໃຫ້ແກ່ຜູ້ຝາກເງິນທີ່ຝາກເງິນໄວ້ນໍາສະມາຊິກຂອງ ສຳນັກງສານປົກປ້ອງເງິນຝາກ ໃນວົງເງິນປົກປ້ອງທີ່ກໍານົດໄວ້ຕາມລະບຽບການ.
ໃນພິການເຜີຍແຜ່ຄັ້ງນີ້ ທ່ານ ນ ດາວມະນີວອນ ວິໄລວຽງ ໄດ້ຍົກໃຫ້ເຫັນສະພາບລວມ ແລະ ເນື້ອໃນຄວາມສຳຄັນຂອງດຳລັດວ່າດ້ວຍການປົກປ້ອງເງິນຝາກ. ໃນນັ້ນ ທ່ານ ນ ດາວມະນີວອນ ວິໄລວຽງ ໄດ້ອະທິບາຍ ແລະ ລົງເລິກ ໃນ 10 ໝວດ ແລະ 58 ມາດຕາ ຂອງດຳລັດວ່າດ້ວຍການປົກປ້ອງເງິນຝາກ.
ຜ່ານການເຜີມແຜ່ຄັ້ງນີ້ ໄດ້ເຮັດໃຫ້ບັນດາທ່ານ ຄູອາຈານ ພ້ອມດ້ວຍນັກສຶກສາມະຫາວິທະຍາໄລແຫ່ງຊາດລາວ ຮັບຮູ້ ແລະ ເຂົ້າໃຈກ່ຽວກັບຄວາມສຳຄັນຂອງວຽກງານປົກປ້ອງເງິນຝາກ ເປັນຕົ້ນແມ່ນ ສິດ ແລະ ໜ້າທີ ຂອງສຳນັກງານປົກປ້ອງເງິນຝາກ, ສິດ ແລະ ໜ້າທີຂອງສະມາຊິກ ສຳນັກງານປົກປ້ອງເງິນຝາກ ແລະ ສິດ ແລະ ໜ້າທີຂອງຜູ້ຝາກເງິນທີ່ໄດ້ຮັບການປົກປ້ອງ.
